એન્ડ્રોઈડ યુઝર્સની સુરક્ષા ફરી એકવાર ખતરામાં છે. એક નવું ટ્રોજન માલવેર આવ્યું છે જે નવા નામ અને સુવિધાઓ સાથે આવે છે. Bleeping Computer ના એક રિપોર્ટ અનુસાર, Escobar નામનો આ માલવેર તમારા ફોન દ્વારા તમારી બેંકની માહિતી ચોરી શકે છે અને તમારું બેંક એકાઉન્ટ પણ ખાલી કરી શકે છે.
Escobar માલવેર યુઝર્સના ફોન પર સંપૂર્ણ નિયંત્રણ મેળવી શકે છે. જો કોઈપણ કારણોસર આ માલવેર તમારા ફોનમાં જાય છે તો તે તમારા ફોનને રેકોર્ડ કરી શકે છે. તમારી જાણ વિના તમારી તસ્વીરો લઈ શકે છે. Escobar યુઝર્સના ફોનમાં પડેલી તમામ એપ્સને ટાર્ગેટ કરે છે જેમાં બેંક સંબંધિત માહિતી હોય છે.
રિપોર્ટ અનુસાર, Escobarને રશિયાના એક હેકિંગ ફોરમ પર જોવામાં આવ્યો છે જ્યાં Aberebot ડેવલપર આ બેંકિંગ ટ્રોજનને પ્રમોટ કરી રહ્યો છે. આ માલવેરની ઓળખ Malware Hunter, McAfee અને Cyble જેવી સુરક્ષા કંપનીઓ દ્વારા પણ કરવામાં આવી છે.
Aberebot/Escobar મૉલવેર કેવી રીતે કરે છે કામ?
Escobar અન્ય બેંકિંગ ટ્રોજનની જેમ જ કામ કરે છે. તે તૃતીય પક્ષના સ્ત્રોત દ્વારા તમારા ફોન પર પહોંચે છે અને પછી તમારા સંદેશાઓ, તમે મુલાકાત લો છો તે સાઈટ્સ અને બેંકિંગ એપ્સને ઘણા દિવસો સુધી સતત મોનિટર કરે છે. આ દરમિયાન તે OTP, PIN વગેરે રેકોર્ડ કરે છે. આ વાયરસ કોઈપણ પ્રકારની કાર્યવાહી કરતા પહેલા સંપૂર્ણ માહિતી એકત્રિત કરે છે. Escobar હાલમાં વિશ્વના 18 દેશોમાં પહોંચી ગયો છે.
આ માલવેર યુઝર્સ પાસેથી 25 પ્રકારની પરમિશન લે છે. જેમાં ઓડિયો રેકોર્ડિંગ, મેસેજ, સ્ટોરેજ, કીલોક, કોલિંગ અને લોકેશન જેવી માહિતીનો સમાવેશ થાય છે. માહિતી એકત્રિત કર્યા પછી, આ માલવેર તેને હેકર્સના સર્વર પર સંગ્રહિત કરે છે. તે પછી હેકર્સ તમારા એકાઉન્ટમાં ઘૂસી જાય છે. આ માલવેર સિમ સ્વેપિંગ પણ કરી શકે છે.
